पुणे, दि. १८ (लोकमराठी) – पुणे ग्रामीण पोलिसांच्या स्थानिक गुन्हे अन्वेषण पथकाने (एसीबी) मोटार सायकल चोरी करणाऱ्या चोरास जेरबंद करण्यात आले आहे. यासह साडेतीन लाखांच्या दहा मोटार सायकल जप्त केल्याची माहिती पोलिसांनी दिली आहे.
प्रकाश महादु दुधवडे( वय -२३ वर्षे, रा.पोखरी, पवळदरा, ता. संगमनेर, जि.अहमदनगर ) असे अटक करण्यात आलेल्या आरोपीचे नाव आहे.
पुणे ग्रामीण स्थानिक गुन्हे शाखेच्या पोलिसांनी दिलेल्या माहितीनुसार; पुणे ग्रामीण मध्ये मागील वर्षभरात सायकल चोरींच्या प्रकरणात कमालीची वाढ दिसून आली. याबाबत पोलिस अधीक्षक अंकित गोयल यांनी स्थानिक गुन्हे शाखेचे पोलीस निरीक्षक अविनाश शिळीमकर यांना मोटार सायकल चोरीबाबत वैयक्तीक दृष्टया लक्ष देवून कारवाई करणेबाबत सुचना केल्या होत्या. त्यानुसार ९ मार्च रोजी स्थानिक गुन्हे शाखेमार्फत मोटार सायकल चोरावर मोठी कारवाई करत दहा लाख रूपये किंमतीच्या एकुण २९ मोटार सायकली हस्तगत करत एकुण २६ गुन्हे उघडककीस आणले होते.
त्याचीच पुनरावृत्ती करत आज दि. १७ मार्च २०२३ रोजी जुन्नर विभागात स्थानिक गुन्हे शाखेचे सपोनि महादेव शेलार, पोहवा दिपक साबळे, पोना संदिप वारे, पोकों अक्षय नवले या पथकाने गोपनीय माहितीच्या आधारे प्रकाश दुधवडे (वय वर्षे २३) यास आळेफाटा बोटा खिंड परीसरातून ताब्यात घेत धडाकेबाज कारवाई करत पुणे ग्रामीण, अहमदनगर जिल्हयातील मोटार सायकल चोरीचे एकूण ०६ गुन्हे उघडकीस आणले असून एकूण तीन लाख पन्नास हजार रूपये किंमतीच्या १० मोटार सायकल हस्तगत केल्या आहेत.
पुणे ग्रामीण स्थानिक गुन्हे शाखेचे प्रभारी अधिकारी वरीष्ठ पोलीस निरीक्षक अविनाश शिळीमकर यांचे नेतृत्वात या आठवडयात स्थानिक गुन्हे शाखेमार्फत हि दुसरी मोठी कारवाई करण्यात आली असुन एकुण ३९ मोटार सायकल जप्त करण्यात आल्या असुन एकुण ३२ गुन्हे उघड करण्यात आले आहेत.
ही कारवाई पुणे ग्रामीणचे पोलीस अधीक्षक अंकित गोयल,अप्पर पोलीस अधीक्षक पुणे विभाग मितेश पट्टे यांचे मार्गदर्शनाखाली स्थानिक गुन्हे शाखेचे पोलीस निरीक्षक अविनाश शिळीमकर, सपोनि महादेव शेलार, पोहवा दिपक साबळे, राजू मोमीण, पोना संदिप वारे, पोकों अक्षय नवले, चापोकों दगडु विरकर यांनी केली आहे.