वडगाव मावळ, दि.१४ (लोकमराठी) – वडगाव नगरपंचायत हद्दीतील नागरिकांना वाढीव शास्ती कर माफ करून,गावठाण हद्द वाढल्यामुळे ग्रामपंचायत काळातील अनधिकृत बांधकामे नियमित करा; अशी मागणी वडगाव मावळ भाजपच्या वतीने करण्यात आली आहे.
वडगाव मावळ भाजपचे शहराध्यक्ष अनंता कुडे यांनी नगरपंचायत सी ओ प्रविण निकम यांना दिलेल्या निवेदनात म्हटले की; मार्च २०१८ रोजी वडगाव ग्रामपंचायत चे रूपांतर नगरपंचायत मध्ये झाल्यामुळे नगर विकास खात्याच्या नियमास अधिम राहून आपण कर आकारणी मध्ये बदल निश्चित करून कर आकारणी केली आहे, परंतु वडगाव शहर मधील सर्व मिळकत धारक यांना आपल्या चुकीच्या कर आकारणी सर्वेक्षणामुळे वाढीव कर लागून आला आहे. सन २०१६ पर्यंत वडगाव शहराकरिता पी एम आर डी च्या नव्हे तर ग्रामपंचायत च्या परवानगीने बांधकामे होत होती.
तरी ग्रामपंचायत काळातील करा सहित थकीत कर हा मिळकत धारकांना शास्ती कर म्हणून आकारला आहे हे चुकीचं असून, शासनाच्या नवीन जी आर नुसार शास्तीकर माफ व्हावा व वडगाव गावठाण हद्द वाढलेले असून त्या पद्धतीने काही मिळकत धारकांचे बेकायदेशीर असलेले बांधकाम अधिकृत करून घेऊन नियमित करावं,ही वाढीव चुकीची कर आकारणी दुरुस्त करून मिळकत धारकांना दिलासा द्यावा.यामध्ये आपण वसुलीच्या कारणास्तव अनेक लोकांचे नळ कनेक्शन तोडत आहात हे सर्व बेकायदेशीर असून आपण नागरिकांना मूलभूत गरजे पासून वंचित करत आहात. लवकरात लवकर आपण या बाबतीत खुलासा करून नागरिकांचे होणारे नुकसान टाळावे. निवेदनाचा विचार गांभीर्यपूर्वक करून कर आकारणी दुरुस्त करावी आणि शास्ती कर माफ करावा अन्यथा नागरिकांच्या असंतोषाच्या कारणास्तव आम्ही वडगाव शहर भाजपा मोठे जनआंदोलन उभे करून नगरपंचायत कार्यालयावर निदर्शन मोर्चा काढू, व त्या वेळी होणाऱ्या परिणामांस पूर्णतः नगरपंचायत प्रशासन जबाबदार असेल, तरी आपण या संपूर्ण विषयाचा सहानुभूतीपूर्वक विचार करून वडगाव नगरपंचायत हद्दीतील नागरिकांना दिलासा द्यावा.
याप्रसंगी वडगाव शहर भाजपाचे अध्यक्ष अनंता कुडे, संघटन मंत्री किरण भिलारे, गटनेते दिनेश ढोरे, विरोधी पक्षनेत्या अर्चना म्हाळसकर, नगरसेवक प्रविण चव्हाण, किरण म्हाळसकर, रविंद्र म्हाळसकर, मा सरपंच संभाजी म्हाळसकर, युवक अध्यक्ष विनायक भेगडे,शरद मोरे, संतोष म्हाळसकर, हरिष दानवे आदि उपस्थित होते.