वडगांव मावळ, दि.१५ (लोकमराठी) – वडगाव शहरातील बंद पडलेली सीसीटीव्ही यंत्रणा पूर्ववत सुरू करावी, अशा मागणीचे निवेदन वडगाव मावळ भाजप महिला आघाडी अध्यक्षा धनश्री भोंडवे यांनी महिला मोर्चाच्या वतीने वडगाव नगरपंचायत तसचे वडगाव पोलिस स्टेशन यांना दिले.
वडगाव शहराची वाढती लोकसंख्या लक्षात घेऊन,तसेच अनेक शासकीय कार्यालये असल्यामुळे वडगांव शहरात नागरिकांची वर्दळ वाढत आहे. या गर्दीचा गैरफायदा घेऊन चोऱ्या, वाटमारी, छेडछाड असे अनेक प्रकार सर्रास होतं आहेत. तसेच अनेक ठिकाणे ही नशापान करण्याची केंद्रे बनत आहेत व याचा समस्त वडगावकर नागरिकांस मनस्ताप सहन करावा लागत आहे. महिलावर्ग भीतीच्या छायेखाली वावरत आहे. या सर्व लांछनास्पद गोष्टींना आळा बसावा यासाठी वडगाव शहर भाजपा महिला मोर्चा ने शहरात सर्व वर्दळीच्या तसेच प्रमुख ठिकाणी सीसीटीव्ही कॅमेरे बसवावेत अथवा असलेले कार्यान्वित करावेत, अशी आग्रही मागणी वडगाव मावळ महिला मोर्चाचे वतीने निवेदन देऊन केली आहे.
यावेळी मा. उपनगराध्यक्षा, नगरसेविका अर्चना म्हाळसकर, वैशाली ढोरे, अश्विनी बवरे, सुमन खेंगले, सुनिता जाधव, संगीता खेंगले, भक्ती जाधव, अक्षदा खेंगले आदी महिला मोर्चा सदस्या उपस्थित होत्या.