अहमदनगर : गोठ्याची भिंत फोडून चोरट्यांनी एक शेळी व दोन करडे लंपास केले. ही घटना सोमवारी (ता. १६) रात्री चांदे खुर्द (ता. कर्जत) येथील भोसले वस्ती येथे घडली.
किशोर भोसले असे शेळी मालकाचे नाव आहे. भोसले यांच्या घराशेजारीच गोठा असून त्यामध्ये ते जनावरे ठेवत असतात. शेळी व करडांसह इतर जनावरे घटनेच्या दिवशी नेहमीप्रमाणे गोठ्यात बांधून भोसले घरामध्ये झोपले होते. त्यावेळी चोरट्यांनी गोठ्याच्या पाठीमागील दगडी भिंत अलगत उचकटून शेळी व दोन करडे चोरून नेले.
भोसले यांना सकाळी ही बाब लक्षात आली. या घटनेमुळे परिसरात खळबळ उडाली असून नागरिकांमध्ये भीतीचे वातावरण निर्माण झाले आहे. दरम्यान, काही दिवसांपुर्वी मुळेवाडी येथे तीन शेळ्यांची तर योगेश मुळे यांच्या घरामध्ये चोरी झाली होती.
कर्जत तालुक्यात चोरीच्या घटना सातत्याने घडत असल्याने पोलिसांसमोर चोरांना पकडण्याचे मोठे आवाहन निर्माण झाले आहे.