![कोविड काळात काम करणाऱ्या ६८७ कामगारांना कायम करा : यशवंत भोसले कोविड काळात काम करणाऱ्या ६८७ कामगारांना कायम करा : यशवंत भोसले](https://lokmarathi.in/wp-content/uploads/2022/09/InCollage_20220913_135740069-1024x576.jpg)
पिंपरी : पिंपरी चिंचवड महानगरपालिकेत कोविड काळामध्ये मानधनावर काम करणाऱ्या ६८७ कामगारांना कायम सेवेत सामावून घ्यावे, असे आदेश राज्य सरकारने पिंपरी चिंचवड महानगरपालिकेला दिले आहेत. अशी राष्ट्रीय श्रमिक आघाडीचे अध्यक्ष यशवंत भोसले यांनी पिंपरी येथे पत्रकार परिषदेत दिली.
याविषयी अधिक माहिती देताना यशवंत भोसले यांनी सांगितले की, पिंपरी चिंचवड महानगरपालिकेत कोरोना काळामध्ये एएनएम, जीएनएम नर्सेस, टेक्निशियन अशा विविध पदांवर मानधनावर कर्मचारी काम करीत होते. या कर्मचाऱ्यांना कायम सेवेत सामावून घ्यावे असा ठराव पिंपरी चिंचवड महापालिकेने १८ मार्च २०२० रोजी मंजूर केला होता. हा ठराव राज्य शासनाकडे मंजुरीसाठी पाठविला होता. यामध्ये आरोग्य व वैद्यकीय विभागातील विविध पदांचा समावेश होता. या ठरावास शासनाची मंजुरी मिळण्याच्या अगोदरच पिंपरी चिंचवड आयुक्तांनी २०२१ मध्ये नर्सेस व आरोग्यातील तांत्रिक कर्मचाऱ्यांची नवीन कामगार भरतीची जाहिरात विविध वृत्तपत्रांमध्ये प्रसिद्ध देऊन त्याची प्रक्रिया सुरू केली होती.
याबाबत राष्ट्रीय श्रमिक आघाडीच्या वतीने अध्यक्ष यशवंत भोसले यांनी आयुक्तांकडे तक्रार अर्ज केला होता. या अर्जाकडे दुर्लक्ष करून आयुक्तांनी भरती प्रक्रिया सुरू ठेवली होती. याबाबत मा. उच्च न्यायालय मुंबई येथे राष्ट्रीय श्रमिक आघाडीच्या वतीने याचिका दाखल करण्यात आली. त्यानंतर त्यावर मुंबई उच्च न्यायालयात सुनावणी झाली. न्यायालयाने आदेश दिले आहेत की, पिंपरी चिंचवड महानगरपालिकेने पाठवलेल्या ठरावाबाबत सहा आठवड्यात निर्णय घ्यावा. त्यानंतर राज्य सरकारच्या नगर विकास विभागाने मा. राज्यपाल यांच्या सहीने ८ सप्टेंबर २०२२ रोजी अध्यादेश जारी केला आहे की, पिंपरी चिंचवड महानगरपालिकेने वैद्यकीय संवर्गातील मानधना वरील वर्ग तीन आणि वर्ग चार च्या कर्मचाऱ्यांना नियमित करणे बाबतच्या प्रस्तावाच्या अनुषंगाने सुनावणी झाली असून. याबाबत दिलेल्या आदेशाची अंमलबजावणी करून कार्यपूर्ती अहवाल सादर करावा.
कोविड काळात कार्यरत कर्मचाऱ्यांनी अत्यंत महत्त्वाचे काम केले असल्याबाबत आयुक्त पिंपरी चिंचवड महानगरपालिका यांनी यापूर्वी कळविलेले आहे. तसेच आयुक्त यांनी त्यांच्या प्रस्तावामध्ये सदरची पदे आवश्यक असल्याचे निदर्शनास आणले आहे. सदर अभिप्रायच्या आधारे आयुक्तांनी सादर केलेल्या प्रस्तावाच्या आधारे या ६८७ एकत्रित मानधन तत्वावरील कार्यरत कर्मचाऱ्यांना महानगरपालिकेच्या सेवेत सामावून घेण्यास काही मान्यता देण्यात आली आहे.
याचा एकूण एकूण ६८७ मानधनावरील कर्मचाऱ्यांना लाभ होणार असून त्याचबरोबर राज्यातील इतर स्थानिक स्वराज्य संस्थांमधील लाखो कर्मचाऱ्यांना देखील या आदेशाचा दूरगामी फायदा होणार आहे. या विषयाबाबत पिंपरी चिंचवड महापालिकेतील नगरसेवक व राज्य सरकारने सकारात्मक भूमिका घेतली, त्याबद्दल यशवंत भोसले यांनी आभार व्यक्त केले व नगरसेवक व राज्य सरकारचे अभिनंदन केले. आयुक्त शेखर सिंह यांनी देखील याबाबत सकारात्मक भूमिका घेतली असल्याचे यशवंत भोसले यांनी पत्रकार परिषदेत सांगितले.
- सुभद्रा जगधने यांचे निधन
- पावसाळ्यापूर्वी विद्युत डीपी बॉक्स व रस्ते दुरुस्ती, नाले, ड्रेनेज व स्ट्रॉम वॉटर लाईनची सफाई करा : सायली नढे
- शहर काँग्रेस पदाधिकाऱ्यांचे ‘न्याय मशाल’ अभियान सुरू
- महाड पोलादपूर तालुका समाज सेवा संघाचा स्नेहमेळावा उत्साहात साजरा
- KALEWADI : मुख्य रस्ता पाणीपुरवठा व जलनिस्सारण वाहिनीच्या कामाचे आमदार अश्विनी जगताप यांच्या हस्ते भूमिपूजन