पिंपरी दि. १५ (लोकमराठी) – भारतीय राज्यघटनेचे शिल्पकार, भारतरत्न डॉ. बाबासाहेब आंबेडकर यांच्या १३२ व्या जयंतीनिमित्ताने पिंपरी चिंचवड शहर राष्ट्रीय स्वयंसेवक संघ यांच्या वतीने अभिवादन करून आदरांजली अर्पण करण्यात आली.
दि.१४ रोजी सकाळी पिंपरी चौकातील भारतरत्न डॉ. बाबासाहेब आंबेडकर यांच्या पुतळ्याला संघ कार्यकर्त्यांनी पुष्पहार अर्पण करून अभिवादन केले.
याप्रसंगी पिंपरी चिंचवड राष्ट्रीय स्वयंसेवक संघाचे माननीय जिल्हा संघचालक विनोद बन्सल,सांगवी गट संघचालक लक्ष्मण पवार, जनकल्याण समितीचे विनोद देशपांडे, महेंद्र बोरकर, नरेंद्र पेंडसे यांच्यासह बहुसंख्य कार्यकर्ते व स्वयंसेवक उपस्थित होते.
समरसता मंचातर्फे पाणपोई
डॉ. बाबासाहेब आंबेडकर जयंतीनिमित्त दरवर्षी रा.स्व. संघाच्या समरसता विभागाच्या वतीने शहरात विविध कार्यक्रम, व्याख्यान, उपक्रमांच्या आयोजनासोबतच पिंपरी येथे डॉ. बाबासाहेब आंबेडकर पुतळा स्थानी अभिवादन करण्यासाठी येणाऱ्या नागरिकांसाठी सामाजिक समरसता मंच व स्व.तात्या बापट स्मृती समिती यांचे वतीने पाणपोईची सोय देखील करण्यात येत असते. १९८९ पासून कोरोना प्रादुर्भावाचा दोन वर्षाचा अपवाद वगळता गेल्या ३० वर्षांपासून ही अविरत सेवा सुरू असल्याचे समरसता मंचच्या कार्यकर्त्यांनी सांगितले. यावर्षी समरसता मंचाच्या पाणपोई चे उद्घाटन राष्ट्रीय स्वयंसेवक संघाचे पिंपरी चिंचवड जिल्हा संघचालक विनोद बन्सल, सांगवी गट संघचालक लक्ष्मण पवार यांचे हस्ते करण्यात आले. यावेळी पंजाब मोंढे, बाळासाहेब सुबंध प्रामुख्याने उपस्थित होते. अभिवादन स्थळी येणाऱ्या नागरिकांनी या पाणपोईचा लाभ घेतला. याच बरोबर पर्यावरण संरक्षण गतिविधि तर्फे हरितगृह उपक्रमाची प्रदर्शनी लावण्यात आली होती.